Message from Founder chairperson

सरस्वती आधारभूत विद्यालयमा अध्ययन गरेका पूर्वविद्यार्थीहरुमध्ये सायद कसैले आफ्नो सुनौलो शैक्षिक जग निर्माण गर्ने यस विद्यालयलाई भुल्न सकेको छ । यस विद्यालयको तत्कालीन सापेक्षिक गुणस्तरीय शिक्षा र अनुशासनको पाठ प्रायः सबैलाई जीवन जीउने पथप्रदर्शक बनेको छ । पूर्व विद्यार्थीहरु गहिरो सम्झनासहित आफ्नो यो प्यारो विद्यालयतर्फ फर्कदै गर्दा देशमा सामुदायिक शिक्षाको स्थिति दयनीय बन्दै गएको यथार्थ पनि छ । सरकारी विद्यालयप्रति राज्यको उपेक्षा र लापरबाही बढेको छ । विद्यार्थीको संख्या घट्दै जाने, त्यही अनुपातमा शिक्षक दरबन्दी घटाउने, जसका कारण विद्यार्थी अझ कम हुने र अन्ततः विद्यालय मर्जरको नाममा बन्द हुने उल्टो यात्राको नीति प्रयोगमा ल्याइएको छ । सरकारले आफ्नो लगानी सीमित विद्यालयमा केन्द्रित गरेकाले समुदाय वा खास संस्था वा व्यक्तिले पहल नगरे धेरै सामुदायिक विद्यालय अन्ततः बन्द हुने दिशामा छन् । हाम्रो प्रिय विद्यालयको पनि नियति त्यही थियो तर त्यसलाई उल्ट्याएर यसलाई नयाँ जीवन दिन हामी सफल भएका छौँ । विद्यालयलाई दमक नगरको अनुकरणीय बनाउने ध्येयका साथ शैक्षिक सत्र २०७७ देखि पूर्वविद्यार्थीको तर्फबाट विद्यालय परिवार र नगरपालिकासँग सहकार्य भइरहेको छ । संस्थाको पहलमा शिक्षक, अभिभावक, स्थानीय बासिन्दा, सरोकारवालाबीच विभिन्न चरणमा छलफल भइसकेका छन् । विद्यालयलाई निरन्तर प्रगतिपथमा डोहो¥याउन पूर्व विद्यार्थी र शिक्षाप्रेमी व्यक्तिहरुको सहयोग एवम् योगदान सह्रानीय छ । यस अभियानको नेतृत्वदायी भूमिकामा पूर्व विद्यार्थीहरुको संस्था सरस्वती एक्स–स्टुडेन्ट्स सोसाइटी (सेस) ले आफूलाई स्थापित गरेको छ । विद्यालयमा भौतिक र शैक्षिक पूर्वाधारको विकासका लागि बजेट जुटाउनदेखि विद्यार्थी संख्या वृद्धि र गुणस्तर अभिवृद्धिसम्म संस्थाको योगदान सर्वविदित छ । विद्यालयमा भएका गतिविधि, प्रगति र दैनिकीको जानकारी पस्किँदै यस अभियानमा अझै बढी पूर्व विद्यार्थीलाई देशविदेशबाट जोड्ने हाम्रो योजना रहेको छ । अन्ततः विद्यालयलाई यस क्षेत्रकै नमूना बनाउने हाम्रो ध्येयमा हातेमालो र सहकार्यका लागि सबै शुभेच्छुक र विशेषगरी पूर्व विद्यार्थीलाई आह्वान गरिन्छ ।

Ramesh Prasad Guragain

Founder Chairperson